Limabræv – februar 2020

Í ár verður okkara góða bygdafelag, Sólarmagn, 125 ár. Felagið varð stovnað í Kirkjubø 10. mars 1895. Vit fara í tí sambandi at hátíðarhalda dagin við at hava opið hús í nýumvældu felagshúsinum á Skarðasteini á Velbastað sjálvan føðingardagin, tá øll eru vælkomin á gátt at síggja nýumvældu hølini og njóta eina hugnaløtu við ymiskum tiltøkum á skránni.

Sunnudagin 8. mars 2020 kl. 16 verður ársaðalfundur. Umframt føstu skránna á aðalfundinum við formansfrágreiðing og vali av nevndarlimum, fer Jenny Petersen stjóri á Tjóðpalli Føroya at siga frá støðuni hjá leiklistini í Føroyum í dag. Hon fer eisini at tríva í ymiskt, sum hon minnist og veit um av sjónleiki, sum hevur verið í Sólarmagni.

Týsdagin 10. mars kl. 19 verður hátíðartiltak í Sólarmagni fyri bygdafólkunum og øðrum innbodnum, har høvi verður hjá øllum at síggja nýumvældu hølini og fáa ein kaffimunn. Á skránni verða røður, framløgur og tónleikur.

Hóskvøldið 27. februar kl. 19.30 hittast tey, ið hava hug at kunna seg meira um staðanøvn á Velbastað og vera við til at seta staðanøvnini inn á teldutøkt kort, sum Havnar kommuna hevur útvegað til endamálið.

1. juni, 2. hvítusunnudag, verður farið útferð suður í Hálvdanshús, sum er sunnanvert Kambin. Hálvdanshús er eitt gamalt vakhús frá sjórænaratíðini, sum kirkjubøingar hava bygt uppaftur fyri nøkrum árum síðan.

Eitt vikuskifti í juni er ætlanin at hava eitt felagstiltak við tónleiki og grill.

Tiltøkini verða nærri lýst á Facebook-síðuni hjá Sólarmagni og á heimasíðuni solarmagn.fo, har meira fæst at vita um felagið og virksemið í felagnum.

Limir, sum ikki hava fasta flyting og sum ikki hava goldið limagjald fyri 2020, fáa eina serliga áheitan um at gjalda limagjald.

Í sambandi við umvælingina av húsinum hevur felagið fingið góðan fíggjarligan stuðul frá kommununi og alifyritøkuni Luna. Fyri stuðulin frá kommununi er húsið umvælt bæði uttan og innan. Fyri stuðulin frá Luna hava vit keypt nýggj borð, nýggjan køk, nýggj wc, nýggjan komfýr og uppvaskimaskinu. Felagið hevur harumframt gjørt íløgu í aðra henta útgerð, so sum stórskíggja og teldu, umframt at ætlanin er af seta upp nýggjar ljóskuplar í felagshølinum. Heitt verður í tí sambandi á limirnar um at stuðla felagnum eftir førimuni við einari peningaupphædd. Limagjald og stuðul kunnu flytast á konto felagsins í BankNordik: 6460 4211342.

Við felagskvøðu

Limagjaldið fyri 2020!!!

Heitt verður á limirnar um at gjalda limagjald fyri 2020. Mælt verður til at limirnir tekna fasta árliga flyting í peningastovni. Limagjaldið er 200 kr um árið, og skal rindast á konto 6460-4211342 í Bank Nordik!

Fundir og tiltøk várhálvu 2017

Fundir og tiltøk 2017

Sunnudagin 28. mai kl. 16 verður limafundur um felagið, virksemið í felagnum og húsið, sum skal umvælast í ár. Fólk kunnu tekna seg sum lim.

2. hvítusunnudag 5. juni skipar felagið fyri útferð í Ambadal, ið er norðuri við Gjógv. Vit skipa fyri felags flutningi við bussi, um nóg stórur áhugi er, og ætla at eta ein bita í Gjáargarði aftan á túrin í Ambadali. Fólk verða biðin um at boða frá luttøku hjá Teiti á tel. 507893 ella hjá Eyðfinni á tel. 210829 í seinasta lagi mánadagin 22. mai.

Á jóansøku leygardagin 24. juni verður felagstiltak. Vit byrja við rundvísing og ølsmakking á bryggjarínum Okkara kl. 11. Seinni um dagin fara vit at rigga til at brenna bál á Hvíthjøllum og fara aftan á í Sólarmagn at hugna okkum við sangi, dansi og onkrum til matna. Kostnaður fyri ølsmakkingina er 125 kr fyri hvønn, avmarkað pláss. Tilmelding hjá John á tel. 599001.

Hóskvøldið 6. apríl hittast fólk í Sólarmagni at skráseta staðarnøvn í telduskipan. Ætlanin er at hittast aðru hvørja viku, at gera hetta arbeiði. Vónandi hittast fólk úr báðum bygdunum hetta kvøld, eisini fyri at avtala, hvussu fram verður farið við skrásetingini. Øll áhugaði verða biðin um at møta.

Dansikvøldini í vetur vóru væleydnað. Byrjað verður aftur leygarkvøldið 21. oktober kl. 21, har øll eru væl komin at vera við. Nærri verður lýst seinni. GG! Hetta tiltak er útsett tvær vikur og verður ístaðin.

Hildið verður annars á at hava dansikvøldini sunnukvøld næsta vetur, har vit leggja dent á at læra okkum kvæðini. Ætlanin er harumframt at hava nøkur meira almenn dansikvøld eini 2-3 leygarkvøld næstu vetrarhálvu. Skrá kemur seinni.

Limagjaldið

Limagjaldið er 200 kr. Heitt verður á fólk um at stovna fasta flyting. Tað fer at lætta nógv um arbeiðið hjá nevndini. Kontonummarið er 6460-4211342 í Bank Nordik.

Heimasíðan – solarmagn.fo | Facebook-vangi – Sólarmagn

Sólarmagn hevur sína egnu heimasíðu solarmagn.fo og egna FB-vanga Sólarmagn, har fólk verða biðin um at leita sær kunning frá felagnum.